ch. 2
Them.2.1
Primus autem gradus fuit capessendae rei publicae bello Corcyraeo: ad quod gerendum praetor a
populo factus non solum praesenti bello, sed etiam
reliquo tempore ferociorem reddidit civitatem.
Them.2.2
nam cum pecunia publica, quae ex metallis redibat, largitione magistratuum quotannis interiret, ille persuasit
populo ut ea pecunia classis centum navium aedificaretur.
Them.2.3
qua celeriter effecta primum Corcyraeos fregit,
deinde maritimos praedones consectando mare tutum
reddidit. in quo cum divitiis ornavit, tum etiam peritissimos belli navalis fecit Athenienses.
Them.2.4
id quantae saluti
fuerit universae Graeciae, bello cognitum est Persico.
nam cum Xerxes et mari et terra bellum universae inferret Europae, cum tantis copiis eam invasit, quantas
neque ante nec postea habuit quisquam:
Them.2.5
huius enim classis mille et ducentarum navium longarum fuit,
quam duo milia onerariarum sequebantur, terrestris
autem exercitus septingenta peditum, equitum quadringenta milia fuerunt.
Them.2.6
cuius de adventu cum fama in
Graeciam esset perlata et maxime Athenienses peti
dicerentur propter pugnam Marathoniam, miserunt
Delphos consultum, quidnam facerent de rebus suis.
deliberantibus Pythia respondit, ut moenibus ligneis
se munirent.
Them.2.7
id responsum quo valeret cum intellegeret nemo, Themistocles persuasit consilium esse
Apollinis, ut in naves se suaque conferrent: eum enim
a deo significari murum ligneum.
Them.2.8
tali consilio probato
addunt ad superiores totidem naves triremes suaque
omnia, quae moveri poterant, partim Salamina, partim
Troezena deportant: arcem sacerdotibus paucisque maioribus natu ad sacra procuranda tradunt, reliquum
oppidum relinquunt.